पहिल्या टप्प्यात तीन बसेस होणार दाखल
ठाणे : मुंबईप्रमाणे ठाण्यातही डबल डेकर बस धावणार असून अर्थसंकल्पात त्याचा समावेश करण्यात आला आहे. पहिल्या टप्प्यात तीन बस घेण्याचे प्रस्तावित असून त्याचे तीन मार्गही निश्चित करण्यात आले आहेत.
ठाणे परिवहनच्या ताफ्यात १२३ इलेक्ट्रीक बसपैकी ११४ बस ताफ्यात दाखल झाल्या असून उर्वरीत बस या २०२४ अखेर दाखल होणार आहेत. सद्यस्थितीत परिवहनच्या ताफ्यात ४४६ बस असून आगामी काळात पीएम ई बस सेवा योजनेअंतर्गत १०० व एनसीएपी अंतर्गत १५ व्या वित्तआयोगाच्या अंतर्गत ८६ बस पुढील आर्थिक वर्षात दाखल होणे अपेक्षित आहे.
जेएनएनयुआरएम अंतर्गत प्राप्त झालेल्या १९० आणि ५० महिलांकरीता तेजस्वीनी बस व १२३ इलेक्ट्रीक बस अशा मिळून ३६३ बस ठाणेकर नागरीकांना सेवा देत आहेत. आगामी दोन वर्षात १८६ इलेक्ट्रीक बस टप्याटप्याने दाखल होणार आहेत. त्यात आता नव्याने डबल डेकर बसचे स्वप्न देखील परिवहनने ठाणेकरांना दाखविले आहे. सध्या इलेक्ट्रीक बसमुळे ठाणेकरांचा प्रवास सुखकर होत आहे. त्यात आता येत्या काळात डबल डेकर बसचा देखील समावेश होणार आहे.
नुकत्याच झालेल्या परिवहनच्या अर्थसंकल्पात डबल डेकर बसचा ओझरता उल्लेख करण्यात आला आहे. परंतु त्यांची संख्या किती असणार, त्या केव्हा येणार याचा उल्लेख दिसून आला नाही. परंतु आता परिवहनच्या ताफ्यात पहिल्या टप्प्यात तीन डबल डेकर बस समाविष्ट होतील अशी माहिती परिवहन सुत्रांनी दिली आहे. मुख्यमंत्री एकनाथ शिंदे यांनी त्याबाबतीत ग्रीन सिग्नल दिला असल्याची माहिती परिवहन सभापती विलास जोशी यांनी दिली. वर्षभराच्या आत त्या बस परिवहनच्या ताफ्यात दाखल करण्याचे प्रयोजन आहे.
मागील काही महिन्यांपासून ठाण्यात मुख्यमंत्र्यांचे बदलते ठाणे या उपक्रमाअंतर्गत अनेक उपक्रम हाती घेण्यात आले आहेत. तसेच सेंट्रल पार्क, चौपाटी, आदींसह काही ऐतिहासिक मंदिरांचा वारसा देखील ठाण्याला लाभला आहे. त्यामुळे बदलते ठाणे ठाणेकरांना डबल डेकर बसमधून पाहता यावे याचे प्रयोजन आखण्यात आले आहे. त्यानुसार यासाठी विलास जोशी यांनी तीन मार्ग निश्चित केले आहेत.
असे आहेत तीन मार्ग
तीन हात नाका ते थेट घोडबंदर गायमुख हा पहिला मार्ग, दुसरा मार्ग शिळफाटा दत्त मंदिर ते डोंबिवलीचा एन्ट्री पॉइंट आणि तिसरा मार्ग पारसिक नगर मुंब्रा वळण रस्ता ते कळवा शिवाजी नगर हा मार्ग निश्चित करण्यात आला आहे. या तीनही मार्गात डबल डेकर बसला कुठेही अडथळा नसल्याचे अभ्यासात दिसून आले आहे. त्यामुळे पहिल्या तीन बस या मार्गावर सोडण्याचे प्रयोजन आहे.
विद्यार्थी आणि ज्येष्ठांना सवलत
शालेय विद्यार्थी आणि ज्येष्ठांना यातून सवलतीच्या दरात प्रवास करण्याची संधी देण्याचे प्रयोजन आहे. त्यानुसार शनिवार आणि रविवारी एकाच तिकीटात तीन मार्गांवर त्यांना डबल डेकर बसमध्ये बसून फिरण्याची संधी देण्याचे प्रयोजन आहे.