* वर्षभरात १४५ कर्मचारी निवृत्त
* पदभरतीला नाही हिरवा कंदील
ठाणे : एकीकडे ठाणे परिवहन सेवेत नवीन बस मोठ्या संख्येने दाखल होत असताना दुसरीकडे मात्र निवृत्त होणाऱ्या कर्मचाऱ्यांची संख्याही मोठी आहे. गेल्या वर्षभरात परिवहनमधून १४५ कर्मचारी निवृत्त झाले असून पुढच्या वर्षी आणखी ७५ पेक्षा अधिक कर्मचारी निवृत्त होणार आहेत. त्यामुळे परिवहन प्रशासनावर मोठा ताण पडणार आहे.
परिवहनच्या ताफ्यात आजच्या घडीला ३०० बस आहेत. त्यावर १५०६ चालक, वाहक आणि इतर कर्मचारी सेवेत आहेत. परिवहनच्या ताफ्यात आता टप्याटप्याने नवीन इलेक्ट्रीक बस येणार आहेत. पहिल्या टप्यात ११ बस सेवेत दाखल झाल्या आहेत. जून अखेरपर्यंत सर्व १६५ इलेक्ट्रीक बस सेवेत दाखल होणार आहेत. या बसचे तिकीट कमी असल्याने प्रवाशांचा देखील त्याला चांगला प्रतिसाद मिळत असल्याचे चित्र आहे. त्यात परिवहनचा यापूर्वी खर्च हा वार्षिक ४१० कोटींच्या आसपास होता. परंतु सातवा वेतन आयोग, कर्मचाऱ्यांना देण्यात येणारी पद्दोन्नती, सेवा निवृत्त कर्मचाऱ्यांचे पेन्शन, कर्मचाऱ्यांची थकबाकी व इतर परिवहनसाठी लागणाऱ्या साहित्यामुळे परिवहनला खर्च हा आजच्या घडीला ५६८ कोटींच्या घरात गेला आहे. त्यामुळे परिवहनला आजही उत्पन्न आणि खर्चाचा ताळमेळ बसविण्यासाठी तारेवरची कसरत करावी लागत आहे. एवढे असूनही परिवहनला सोमवारी २७ लाख ९८ हजारांचे उत्पन्न प्राप्त झाले आहे. यापूर्वी परिवहनला कधी १६ तर कधी २२ लाखापर्यंतचे उत्पन्न मिळत होते. परंतु त्यातही वाढ झाल्याचे दिसून आले आहे.
परिवहनला आता सेवानिवृत्त होत असलेल्या कर्मचाऱ्यांचे टेन्शन अधिक असल्याचे दिसत आहे. परिवहनच्या ताफ्यातील १४५ कर्मचारी हे मागील वर्षभरात सेवानिवृत्त झाले आहेत. तर आता आणखी ७५ च्या आसपास कर्मचारी सेवानिवृत्त होणार आहेत. त्यामुळे हळू हळू परिवहनमध्ये पोकळी निर्माण होण्याचे संकट गडद होऊ लागले आहे. त्यात शासनाकडून नवीन पदे भरण्यास हिरवा कंदील नसल्याने यावर तोडगा कसा काढायचा असा पेच परिवहनला पडला आहे. खासगी तत्वावर येत्या काळात चालक भरले जाणार असून किमान वेतनद्वारे वाहक भरण्याचे प्रयत्न परिवहनमार्फत केले जाणार असल्याची माहिती परिवहनच्या सुत्रांनी दिली.