ठाणे महापालिकेचे लक्ष्य ठेवून तरुणांना जबाबदाऱ्या
ठाणे: आगामी ठाणे महापालिका निवडणुकीत एक हाती सत्ता काबीज करण्यासाठी भाजपने आणखी एक डाव खेळला आहे. याआधी मंडल संख्या १२ असताना ती सहाने वाढवत भाजपने शहरात १८ मंडल अध्यक्ष दिले आहेत. विशेष म्हणजे हे सर्व अध्यक्ष तरुण असून यात प्रथमच तीन महिला अध्यक्ष देण्यात आले आहेत.
नवीन मंडल अध्यक्षांवर स्थानिक संघटना बळकटीची जबाबदारी सोपवण्यात आली असून शिवसेनेच्या युवा सेनेला टक्कर देणारी ही तरुणांची फौज महापालिका निवडणुकीच्या पार्श्वभूमीवर काम करणार असून त्यांच्या मदतीने पालिकेवर शत प्रतिशतचे स्वप्न भाजप पाहत आहे.
महाराष्ट्रात आज एकाच वेळी मंडल अध्यक्षांची निवड करण्यात आली. त्यानुसार ठाणे शहर जिल्ह्यात आज भाजपाने संघटनात्मक बदल करीत शहरातील १८ मंडल अध्यक्षपदी तरुणाईला संधी दिली आहे. ३५ ते ४५ वयोगटातील आक्रमक तरुण कार्यकर्त्यांच्या हाती स्थानिक संघटना सोपविली आहे. यापूर्वी भाजपाची ठाणे महापालिका क्षेत्रात १२ मंडले अस्तित्वात होती. त्याची पुनर्रचना करून १८ मंडले तयार करण्यात आली, अशी माहिती जिल्हाध्यक्ष संजय वाघुले यांनी दिली. आगामी ठाणे महापालिका निवडणूक डोळयासमोर ठेवून ही निवड करण्यात आली आहे. पालिका काबिज करायची असेल तर अनुभवी नेत्यांसोबत आक्रमक तरुणांची फौज असणे आवश्यक आहे, हे पक्षाच्या ध्यानी आल्यानेच मंडल अध्यक्षपदी यावेळी तरुणांना संधी देण्यात आली आहे.
भाजपाचे आमदार संजय केळकर, आमदार निरंजन डावखरे, प्रदेश सरचिटणीस माधवी नाईक यांच्या मार्गदर्शनाखाली भाजपा कार्यकर्त्यांबरोबर संवाद साधण्यात आला. त्यांच्या अपेक्षा जाणून घेऊन नव्या मंडलाध्यक्षांची निवड करण्यात आली. भाजपाच्या संघटन पर्व अभियानात शहरात नोंदणीलाही नागरिकांनी उत्स्फूर्त प्रतिसाद मिळाला. शहरातील सर्व भागात संघटनात्मक जाळे मजबूत करून प्रत्येक बूथवर ५१ टक्के मते मिळविण्याचा निर्धार करण्यात आला आहे, अशी माहिती जिल्हाध्यक्ष संजय वाघुले यांनी दिली.
भाजपाच्या वडवली मंडल अध्यक्षपदी ज्योती ठाकूर, वसंत विहार-शिवाईनगर अध्यक्षपदी राकेश चौघुले, वर्तकनगर-माजिवडा अध्यक्षपदी वैभव कदम, लोकमान्यनगर अध्यक्षपदी निलेश पाटील, ज्ञानेश्वर नगर-वैतीवाडी अध्यक्षपदी भूषण पाटील, इंदिरानगर अध्यक्षपदी गुलाब झा, वागळे इस्टेट अध्यक्षपदी निलेश लोहोटे, कोपरी अध्यक्षपदी कृष्णा भुजबळ, ब्रह्रांड-बाळकूम अध्यक्षपदी निलेश पाटील, मानपाडा अध्यक्षपदी जितू मढवी, राबोडी अध्यक्षपदी विनया भोईर, वृंदावन-पाचपाखाडी अध्यक्षपदी प्रमोद घोलप, नौपाडा अध्यक्षपदी रोहित गोसावी, कळवा पश्चिम अध्यक्षपदी तेजस चंद्रमोरे, कळवा पूर्व अध्यक्षपदी कृष्णा यादव, मुंब्रा अध्यक्षपदी सुजित गुप्ता, कौसा अध्यक्षपदी नाझिया तांबोळी, दिवा अध्यक्षपदी सचिन भोईर यांची निवड करण्यात आली आहे.
भाजपा ठाणे शहर जिल्ह्यात अनेक वर्षांपासून मंडल अध्यक्षपदी पुरुष कार्यकर्त्यांची निवड केली जात होती. मात्र, यंदा प्रथमच १८ पैकी तीन मंडलांचा कारभार महिलांच्या हाती सोपविण्यात आला आहे. वडवली मंडल अध्यक्षपदी ज्योती ठाकूर, राबोडी अध्यक्षपदी विनया भोईर आणि कौसा अध्यक्षपदी नाझिया तांबोळी यांची निवड केली.
ठाण्यात शिवसेना शिंदे गटाला घेरण्याची एकही संधी भाजप सोडत नसल्याचे दिसत आहे. गेल्या निवडणुकीत शिवसेना आणि भाजप पालिका निवडणूक स्वतंत्रपणे लढली होती. या निवडणुकीत भाजपला तिसर्‍या क्रमांकावर समाधान मानावे लागले होते. तर शिवसेनेला एकहाती सत्ता मिळाली होती.
शिवसेनेचे दोन गट झाले आहेत. ठाकरे गट कमकुवत झाला आहे. तर शिवसेना शिंदे गट बजबूत असला तरी केंद्र आणि राज्यातील नेतृत्वाच्या बळावर ठाणे महापालिकेवर एकहाती कमळ फुलवण्याचे लक्ष्य स्थानिक नेत्यांनी ठेवले आहे. त्यामुळे आगामी काळात युतीची शक्यता धुसर दिसत आहे.