भाईंदर : सुट्टीच्या दिवशीही मालमत्ता कर भरणा केंद्र सुरू ठेवून ३१ मार्च २०२४ रोजी मध्यरात्रीपर्यंत मीरा-भाईंदर महानगरपालिका मालमत्ता कर विभागामार्फत ₹१९३ कोटीची विक्रमी करवसुली करण्यात आली आहे.
मालमत्ता कर वसुलीचा वेग हा आणखी जास्त प्रमाणात वाढवण्यात यावा यासाठी आढावा बैठकीनुसार शहरातील मालमत्ता कराचा सतत पाठपुरावा करण्याचे निर्देश देण्यात आले होते. शहरामधील मालमत्ताधारकांकडे वर्षानुवर्षे थकबाकी असल्याने अशा वर्षानुवर्षे थकित असलेल्या मालमत्तांच्या बाबतीत महापालिका आयुक्तांच्या आदेशानुसार सदर मालमत्ता जप्त करण्यात याव्यात व त्यावर महानगरपालिकेचे नाव चढवून अशा मालमत्ता जाहीर लिलावद्वारे विक्री करण्याचे निर्देश देण्यात आले होते. सदर कारवाईस सुरुवात होताच व जनजागृती केल्याने शहरातील मालमत्ता धारकांनी करभरणा करण्यास सुरुवात केली होती.
३१ मार्च २०२४ रोजी मध्यरात्रीपर्यंत मालमत्ता कर विभागामार्फत १९३ कोटी मालमत्ता कर वसुली करण्याचे श्रेय आयुक्त संजय काटकर यांनी अतिरिक्त आयुक्त, उपायुक्त (कर विभाग), नियंत्रण अधिकारी, सहाय्यक नियंत्रण अधिकारी, मालमत्ता कर विभागप्रमुख, सर्व कर निरीक्षक, कर वसुली लिपिक व कर्मचारी यांना दिले आहे. मागील वर्षी ३१ मार्च २०२३ रोजी १८२ कोटी इतकी कर वसुली करण्यात आली होती. मागील वर्षीच्या तुलनेत यंदाची मालमत्ता कर वसुली ही उत्कृष्टरित्या व वेगाने झाली आहे. आयुक्तांच्या निर्देशानुसार, उपायुक्त (माहिती तंत्रज्ञान) यांच्या मार्गदर्शनाखाली माहिती व तंत्रज्ञान अधिकारी यांच्या विभागामार्फत विकसित करण्यात आलेल्या www.mbmc.gov.in वेबसाईट व MyMBMC मोबाईल अॅपचा वापर करून मालमत्ता कर भरणा करण्यासाठी नागरिकांना आवाहन करण्यात आले होते.
या आवाहनाला नागरिकांनी प्रतिसाद देत ऑनलाईन पद्धतीने एक लाख १०,९७४ नागरिकांनी तर रोख रक्कमद्वारे एक लाख ७३,५७३ नागरिकांनी कर भरणा करून महापालिकेस सहकार्य केले आहे. महापालिकेच्या तिजोरीत एकूण मालमत्ता कर १९३ कोटी आठ लाख ३६,२५३ इतका जमा करण्यात आलेला आहे.