नरेश म्हस्के यांची सडेतोड टीका
ठाणे : आदित्य ठाकरे यांचा ठाण्यात कॉमेडी शो होता, यापुढे त्यांना नकाला करणे हाच एकमेव उद्योग राहणार आहे. दुसरे काहीच काम त्यांच्याकडे शिल्लक राहणार नाही, अशी टीका शिवसेनेचे प्रवक्ते नरेश म्हस्के यांनी केली आहे.
रविवारी आदित्य ठाकरे यांनी ठाण्यातील विविध शाखांना भेटी दिल्या. त्यानंतर मुख्यमंत्री एकनाथ शिंदे यांना आव्हान करीत राजीनामा द्या, मी ठाण्यातून लढतो असे थेट आव्हान दिले. त्यानंतर या संदर्भात सोमवारी म्हस्के यांनी आदित्य ठाकरे यांच्यावर खरमरीत टीका केली.
पक्षाची वाताहत झालेली आहे. जे शिल्लक राहिलेले आहेत, ते देखील परतीच्या मार्गावर आहेत, त्यामुळे आधी घर सांभाळा मग आव्हान द्या असा उलट टोला श्री.म्हस्के यांनी लगावला. ठाण्यात त्यांनी केवळ एक नक्कल करण्यापलिकडे काहीच केले नसून तो एक कॉमेडी शो होता, अशी टीकाही त्यांनी केली.
मुख्यमंत्री एकनाथ शिंदे आणि खासदार श्रीकांत शिंदे यांच्यावर बोलण्या इतके आपण तेवढे मोठे झालेला नाहीत, याचीही आठवण म्हस्के यांनी करुन दिली. आधी पुरूषांच्या आवाजात बोला नंतर आव्हान द्या, असेही ते म्हणाले. तुम्हाला खासदार शिंदे यांनी कल्याणचे आव्हान दिले आहे, ते तरी आधी स्विकारा आणि निवडणुका लागल्यावर या समोरासमोर, मग बघूया आव्हान कोणाचे आहे. ते स्वत: ज्या ठिकाणी राहतात, तो मतदारसंघ सोडून वरळीसारख्या सुरक्षित मतदार संघाची निवड केली. आता परत सुरक्षित मतदारसंघ शोधत असल्याचीही टीका श्री.म्हस्के यांनी केली.
मुख्यमंत्र्यांकडे राजीनामा मागण्याआधी तुम्ही आमदारकीचा राजीनामा देतो सांगितले. राजीनामा दिला का? असा सवालही त्यांनी केला. रविवारी तीन ते चार ठिकाणी झालेल्या कार्यक्रमात तीच तीच माणसे दिसत होती. बाहेरचे उसणे अवसान कशाला आणता? पदासाठी आम्ही मुख्यमंत्री एकनाथ शिंदे यांच्यासोबत नाही. शिवसैनिकांची बाजू घेणारा, त्यांच्या मागे उभा राहणारा, बाळासाहेबांचे विचार अंगीकारलेला माणूस असल्याने आम्ही शिंदे यांच्या सोबत असल्याचे त्यांनी स्पष्ट केले. आमच्यात गैरसमज करण्याचा प्रयत्न करु नका. आमच्यात भांडणे लावण्याचे काम करु नका, असेही श्री.म्हस्के यांनी बजावले.
ठाणे तुमचे म्हणताय, मग नगरसेवक यांच्यासोबत का राहिले नाहीत, याचा विचार करावा. जे शिल्लक राहिले आहेत, ते देखील परतीच्या मार्गावर असल्याचा दावाही त्यांनी केला. त्यामुळे आपल्या सोबत कोण आहे, त्याचे आत्मपरिक्षण करा मग ठाण्यावर दावा करा, असे आव्हानही श्री.म्हस्के यांनी दिले.