सहा वर्षे लढवता येणार नाही निवडणूक
भिवंडी: भिवंडी-निजामपूर शहर महानगरपालिकेच्या महापौर आणि उपमहापौर पदासाठी झालेल्या निवडणुकीत काँग्रेसचे १८ नगरसेवक फुटले होते. २०१९ मध्ये झालेल्या निवडणुकीत भाजप कोणार्क विकास आघाडीच्या प्रतिभा पाटील तर उपमहापौर पदावर कोणार्क पुरस्कृत काँग्रेसचे नगरसेवक इम्रान वली मोहम्मद खान हे विजयी झाले होते. या १८ बंडखोर नगरसेवकांवर कारवाई करण्यात आली आहे.
भिवंडी महानगरपालिकेतील १८ बंडखोर काँग्रेस नगरसेवकांचे सदस्यत्व रद्द झाले आहे. यासह या नगरसेवकांना पुढील सहा वर्षे निवडणूक लढविण्यास बंदी घालण्यात आली आहे. नगरविकास विभागात मुख्यमंत्री एकनाथ शिंदे यांनी निकाल दिला आहे.
5 डिसेंबर 2019 मध्ये महापौर व उपमहापौर निवडणुकीत काँग्रेस पक्षाच्या 18 नगरसेवकांनी काँग्रेस पक्षाच्या महापौर पदाच्या उमेदवार यांच्या विरोधात मतदान करून बंडखोरी केली होती. त्या विरोधात माजी महापौर जावेद दळवी यांनी सदस्यत्व रद्द करण्यासाठी याचिका दाखल केली होती.
महापौर पदासाठी कॉग्रेसतर्फे रिषिका राका आणि भाजप-कोणार्क विकास आघाडीच्या नगरसेविका प्रतिभा पाटील या रिंगणात असल्याने पीठासीन अधिकारी जोंधळे यांनी हात वर करून मतदान घेतले. या मतदान प्रक्रियेत कोणार्क विकास आघाडीसह आरपीआय (एकतावादी), समाजवादी पक्ष आणि भाजपबरोबरच काँग्रेसच्या १८ नगरसेवकांनी कोणार्कच्या उमेदवार प्रतिभा पाटील यांना मतदान केल्याने त्या 49 मतांनी विजयी झाल्या. तर शिवसेना-काँग्रेस युतीच्या नगरसेविका रिषिका राका यांना अवघी ४१ मते मिळाल्याने त्यांचा पराभव झाला.
भिवंडी महापालिकेत काँग्रेसचे एकूण ४७ नगरसेवक होते. तिथे काँग्रेस आणि शिवसेनेची सत्ता होती. भिवंडी महापालिकेत ९० नगरसेवक असून त्यामध्ये कॉग्रेसचे ४७, शिवसेना १२, भाजप २०, कोणार्क विकास आघाडी चार, समाजवादी पार्टी दोन, आरपीआय (एकतावादी) चार, अपक्ष एक असे पक्षीय बलाबल होते.
श्रीमती नमरा औरंगजेब अन्सारी, श्रीमती मिस्बाह इम्रान खान, इम्रान वली मोहम्मद खान, अहमद हुसेन मंगरू सिद्दीकी, अर्शद मोहम्मद अस्लम अन्सारी, श्रीमती शबनम मेहबूब रेहमान अन्सारी, श्रीमती अंजुम अहमद हुसेन सिद्दीकी, मलिक नजीर मोमीन, श्रीमती जरीना नफिस अन्सारी, श्रीमती साजिदा मोमीन, श्रीमती शाकीरा अहमद शेख, श्रीमती समिना सोहेल शेख, श्रीमती राबिया मोहम्मद शमीम अन्सारी, तफज्जुल हुसेन मकसूद हुसेन अन्सारी, श्रीमती शिफा अश्फाक अन्सारी, नसरुल्लाह मोहम्मद अन्सारी, श्रीमती हुसना परवीन मोहम्मद याकूब अन्सारी आणि मतलुब अफजल खान अशी सदस्यत्व रद्द झालेल्या नगरसेवकांची नावे आहेत.