ठाणे: किसनगरमधील क्लस्टरच्या लाभार्थ्यांना ३२३ चौरस फूट कार्पेटचे (वन बीएचके) चे घर मिळणार असून या घरात दोन स्वच्छता गृह असणार आहेत. पहिल्या टप्प्यात दहा हजार घरांचे उद्दिष्ट पूर्ण करण्यासाठी सिडको आणि ठाणे महापालिका सज्ज झाली आहे.
गेली दहा वर्षे प्रतिक्षेत असलेल्या धोकादायक अधिकृत आणि अनधिकृत इमारतींमध्ये जीव मुठीत घेऊन राहणार्‍या ठाणेकरांना लवकरच ‘सुरक्षित’ निवार्‍याच्या चाव्या मिळणार आहेत. देशातीलच नव्हे तर आशिया खंडातील सर्वात मोठ्या, महत्वाकांक्षी व ऐतिहासिक समुह विकास योजना (क्ल्स्टर) मूर्त रुप घेत त्याचा पायाभरणी सोहळा जूनच्या पहिल्या आठवड्यात होणार असल्याचे वृत्त ‘ठाणेवैभव’ने २९ मे रोजी प्रसिद्ध केले होते. या वृत्तावर ठाणे महापालिकेने शिक्कामोर्तब केले असून या महत्वपूर्ण प्रकल्पाचा शुभारंभ सोहळा सोमवारी ५ जून रोजी महाराष्ट्राचे मुख्यमंत्री एकनाथ शिंदे यांच्या हस्ते व उपमुख्यमंत्री देवेंद्र फडणवीस यांच्या प्रमुख उपस्थितीत होणार आहे. त्याचप्रमाणे समूह विकास योजनेचे कामकाज सांभाळण्यासाठी कशिश पार्क येथे क्लस्टर पुनर्विकासाचे कार्यालय निर्माण करण्यात आले आहे. या प्रशस्त कार्यालयाचे उद्घाटनही मुख्यमंत्री एकनाथ शिंदे हस्ते होणार आहे.
ठाणे शहरात मोडकळीस आलेल्या धोकादायक अनधिकृत व अधिकृत इमारतींचा सुनियोजित व संपूर्ण नागरी पायाभूत सुविधांसह पुनर्विकास व्हावा यासाठी एकूण ४५ नागरी पुनरुत्थान आराखडे तयार करण्यात आले आहेत. त्याचे एकूण क्षेत्रफळ १५०० हेक्टर एवढे आहे. या ४५ आराखड्यापैकी अत्यंत दाटीवाटीचे क्षेत्र असलेल्या किसननगर नागरी पुनरुत्थान आराखडा क्र. १२ मधील नागरी पुर्नरुत्थान योजना क्र. १ व २ च्या कामाच्या प्रत्यक्ष कामाला सिडकोमार्फत सोमवारपासून सुरुवात होणार आहे. येथे तीस हजार घरे आहेत पहिल्या टप्प्यात दहा हजार घरे तयार करण्यात येणार आहेत. या भागातील अनधिकृत व अधिकृत धोकादायक इमारतीचा सामूहिक पुर्नविकास करण्याच्या दृष्टीने मुख्यमंत्री एकनाथ शिंदे यांच्या संकल्पनेतून नियमावली तयार करण्यात आली आहे.
या योजनेच्या कामाची सुरूवात अंतिम भूखंड क्र. १८६/१८७ या वरील ७७५३ चौ.मी क्षेत्रफळावरील भूखंडावर त्याचप्रमाणे रस्ता क्रमांक २२ लगतचा भूखंड क्रमांक एफ – ३ या ठिकाणी १९२७५ चौ.मी. एवढया जागेवर करण्यात येणार आहे.
अनधिकृत इमारतीसह वसाहतीचा टाऊनशीप धर्तीवर एकत्रित पुनर्विकासाचा प्रकल्प साकारण्याचा प्रयत्न असणार आहे. प्रख्यात वास्तुविशारद हाफिज कॉन्ट्रॅक्टर यांच्या डिझाईननुसार टाऊनशीपची उभारणी केली जाणार आहे. मोडकळीस आलेल्या घरातून थेट सुरक्षित व सुनियोजित संकुलामध्ये घर, पात्र निवासी लाभधारकास विनामूल्य ३२३ चौ. फूट मालकी हक्काचे घर या योजनेंतर्गत मिळणार आहे.त्यामध्ये दोन स्वच्छता गृह असणार आहेत.
प्रत्येक सेक्टरमध्ये सण, उत्सव, धार्मिक कार्यक्रम सामाजिक उपक्रमांसाठी विशेष जागा, प्रत्येक सेक्टरमध्ये वाचनालय, व्यायामशाळा, आरोग्यकेंद्र आणि कम्युनिटी सेंटरची व्यवस्था असेल. पाळणाघरासह महिला सक्षमीकरण केंद्र आणि ज्येष्ठ नागरिकांसाठी विरंगुळा केंद्र असणार आहे. प्रशस्त व दर्जेदार रस्ते आणि वाहतूक सुविधा, पाणीपुरवठा, मल व जलनिःस्सारण, घनकचरा व्यवस्थापनासह पायाभूत सुविधाही या योजनेत असणार आहेत. पुनर्विकसित टाऊनशीप आराखड्यामध्ये सुसज्ज आरोग्य, शैक्षणिक, क्रीडा, मनोरंजन, उद्यान पार्किंग, मंडई आदी नागरी सुविधांचा समावेश या योजनेत आहे.
दर्जेदार प्रशस्त रस्ते, विरंगुळ्यासाठी उद्याने, आरोग्यकेंद्र, शाळा, व्यायामशाळा, खरेदीसाठी बाजारपेठ इतकेच नव्हे तर पाळणाघर, समाजमंदिर… एखाद्या मोठ्या टाऊनशिपलाही लाजवेल अशा आशिया खंडातील सर्वात मोठ्या क्लस्टर योजनेचा पाया ठाण्यात सोमवारी रचला जाणार आहे.