मुख्यमंत्र्यांनी दाखविला झेंडा
ठाणे : मुख्यमंत्री एकनाथ शिंदे यांच्या नियोजित अयोध्या दौऱ्याला प्रतिसाद देत शुक्रवारी सुमारे दोन हजार शिवसैनिक एका विशेष ट्रेनने अयोध्येला रवाना झाले. यावेळी मुख्यमंत्र्यांनी ठाणे रेल्वे स्थानकात उपस्थित राहून ट्रेनला हिरवा झेंडा दाखविला.
जय श्रीराम आणि शिवसेनेच्या घोषणा देत कार्यकर्ते या विशेष ट्रेनने अयोध्येला रवाना झाले. यावेळी त्यांच्या समेवत खासदार डॉ. श्रीकांत शिंदे, आमदार रविंद्र फाटक, बालाजी किणीकर आदींसह शेकडो पदाधिकारी उपस्थित होते. या विशेष ट्रेनने ठाणे, भिवंडी, मीरा-भाईंदर, नवी मुंबई, कल्याण येथील शिवसैनिक रवाना झाला आहे. मुख्यमंत्री एकनाथ शिंदे यांच्या नेतृत्वाखाली रविवारी शिवसेनेचे खासदार, मंत्री आणि आमदार अयोध्येला उपस्थित राहणार आहेत. त्यासाठी शिवसेनेच्या प्रत्येक पदाधिकाऱ्यावर आणि कार्यकर्त्यांवर जबाबदारी सोपवण्यात आली आहे. विशेष म्हणजे रविवारी शिवसेनेच्या पदाधिकारी आणि माजी नगरसेवकांवर आपापल्या विभागात महाआरती करण्याचे निर्देश देण्यात आले आहेत. शिवसेनेचे स्थानिक नेते अगोदरच अयोध्येत तळ ठोकून बसले आहेत. ठाण्यातून सुमारे दोन हजारहून अधिक शिवसैनिक अयोध्येला निघाले आहेत. त्यासाठी १६ डब्यांची विशेष एसी लोकल ठाणे स्थानकातून शुक्रवारी दुपारी सव्वा चार वाजताच्या सुमारास रवाना झाली. यावेळी कार्यकर्त्यांचा पेहराव देखील काही वेगळा होता. अनेकांनी जय श्रीराम’ चे टी शर्ट परिधान केले होते. जय श्री रामाचा जयघोषही यावेळी करण्यात आला. तर मुख्यमंत्री शिंदे यांनी देखील हाती भगवा झेंडा घेतला होता. या ठिकाणी आलेल्या प्रत्येक पदाधिकारी आणि कार्यकर्त्यांची शिंदे यांनी भेट घेतली.
घरात बसणाऱ्यांना मी बाहेर काढले-एकनाथ शिंदे
माझ्या दौऱ्यामुळे सर्वजण कामाला लागले आहेत. मी घरात बसणाऱ्यांना बाहेर काढले आहे, अशा शब्दात मुख्यमंत्री एकनाथ शिंदे यांनी उध्दव ठाकरे आणि अदित्य ठाकरे यांच्यावर यावेळी टीका केली. अयोध्येत प्रभु रामचंद्रांचे भव्यदिव्य मंदिर व्हावे हे बाळासाहेब ठाकरे यांचे स्वप्न होते. आज ते स्वप्न साकार होत असल्याचेही त्यांनी यावेळी सांगितले