मेट्रो जोडामुळे मुंबई-ठाणे-कल्याण प्रवास होणार सुलभ आणि सुसाट
ठाणे: अनेक वर्षांपासून प्रतिक्षेत असलेल्या ठाण्यातील वर्तुळाकार मेट्रो प्रकल्पाला गती मिळाली असून महा मेट्रोने 223.70 कोटी रुपयांची निविदा जाहीर केली आहे. ही अंतर्गत वर्तुळाकार मेट्रो ही मेट्रो ४ आणि ५ यांच्याशी थेट जोडली जाणार असल्याने मुंबई-ठाणे-कल्याण प्रवास सुलभ आणि सुसाट होणार आहे.
मिळालेल्या माहितीनुसार, ठाणे शहरातील अंतर्गत वाहतूक कोंडी कमी करण्याच्या उद्देशाने महामेट्रोने 223.70 कोटी रुपयांची निविदा जाहीर केली आहे. या निविदेअंतर्गत डॉ. काशिनाथ घाणेकर नाट्यगृह, मानपाडा, डोंगरीपाडा, विजय नगरी, वाघबीळ आणि वॉटरफ्रंट या ठिकाणी उन्नत मेट्रो स्थानकांचे बांधकाम करण्यात येणार आहे.
ठाणे अंतर्गत वर्तुळाकार मेट्रो मार्गाची एकूण लांबी 29 किलोमीटर असून, या मार्गावर एकूण 22 मेट्रो स्थानके असतील. प्रकल्पाच्या पहिल्या टप्प्यात सहा किलोमीटर लांबीच्या मार्गावर सहा स्थानकांचे काम पूर्ण केले जाणार आहे. संपूर्ण मार्गिकेपैकी सुमारे 26 किलोमीटरचा मार्ग उन्नत (एलिव्हेटेड) स्वरूपाचा असेल. ठाणे रेल्वे स्थानकाजवळील दोन मेट्रो स्थानके भूमिगत (अंडरग्राउंड) असणार असून, त्यामुळे रेल्वे आणि मेट्रोमधील बदल (इंटरचेंज) अधिक सोपा होणार आहे.
या मेट्रो प्रकल्पामुळे वागळे इस्टेट, घोडबंदर रोड, कोलशेत, साकेत यांसारख्या ठाण्यातील महत्त्वाच्या अंतर्गत भागांना थेट मेट्रो जोड मिळणार आहे. परिणामी, या परिसरातील नागरिकांचा दैनंदिन प्रवास अधिक वेगवान होऊन वेळेची मोठी बचत होणार आहे.
ठाणे अंतर्गत वर्तुळाकार मेट्रोचा मुंबई मेट्रो 4 आणि मेट्रो 5 मार्गिकांशी थेट संपर्क राहणार आहे. त्यामुळे ठाणे ते मुंबई तसेच ठाणे ते कल्याण असा मेट्रो प्रवास शक्य होणार असून, उपनगरांमधील प्रवाशांना मोठा दिलासा मिळणार आहे.
2045 पर्यंत या मेट्रो मार्गिकेवरून दररोज सुमारे आठ लाख 70 हजार प्रवासी प्रवास करतील, असा अंदाज वर्तवण्यात आला आहे. राज्य आणि केंद्र सरकारच्या संयुक्त भागीदारीतून उभारण्यात येणारा हा प्रकल्प सुमारे 12,200 कोटी रुपये खर्चाचा असून, ठाण्याच्या सार्वजनिक वाहतुकीला नवी दिशा देणारा ठरणार आहे.