News
Stay updated with the latest stories, happenings, and developments from Thane.
महाराष्ट्र
मेट्रोच्या कामामुळे मध्यरात्री घोडबंदर रोडवर वाहतूक कोंडी
मेट्रोच्या कामामुळे मध्यरात्री घोडबंदर रोडवर वाहतूक कोंडी
फोटो: ठाणे वैभव
गर्डरच्या कामामुळे केले महत्वाचे वाहतूक बदल
ठाणे : वाहतुकीच्या दृष्टीने महत्वाच्या असलेल्या मेट्रो ४ च्या कामाला वेग आला असून या कामामुळे घोडबंदर पट्ट्यात मात्र मध्यरात्री मोठ्या प्रमाणात वाहतूक कोंडी होत आहे. त्यामुळे या पट्ट्यातून रात्री प्रवास करणारे वाहनचालक अक्षरशः हैराण झाले आहेत.
याच कामाचा एक भाग म्हणून वाघबीळ भागात गर्डर टाकण्याचे काम सुरु करण्यात येणार असून यामुळे वाहतूक विभागाने या पट्ट्यात मोठे बदल केले असून २७, ३१ मार्च आणि १ एप्रिल या तीन दिवसांमध्ये या पट्ट्यात वाहतूक बदल करण्यात आले आहेत.
ठाणे शहरात मुंबई महानगर प्रदेश विकास प्राधिकरणाच्या (एमएमआरडीए) माध्यमातून मेट्रो मार्गिकेच्या निर्माणाचे काम सुरू आहे. या मार्गिकेचा महत्त्वाचा टप्पा सध्या घोडबंदर भागात सुरू आहे. या कामाचा भाग म्हणून वाघबीळ भागात मेट्रोच्या खांबावर गर्डर उभारले जाणार आहेत. त्यामुळे ठाणे पोलिसांनी या मार्गावर वाहतुक बदल लागू केले आहेत. यामध्ये ठाण्याहून घोडबंदरच्या दिशेने वाहतुक करणाऱ्या वाहनांना वाघबीळ उड्डाणपुलाजवळ प्रवेशबंदी करण्यात आली आहे. येथील वाहने छेद रस्त्यावरून विरुद्ध दिशेने वाहतुक करत उड्डाणपुलावरून जातील. तसेच घोडबंदरहून ठाण्याच्या दिशेने वाहतुक करणारी वाहने उड्डाणपुलाखालील मार्गावरून वाहतुक करतील. २६ ते २७ मार्च आणि ३१ मार्च ते १ एप्रिल या कालावधीत रात्री ११.५५ पहाटे ४ यावेळेत हे वाहतुक बदल लागू असतील.
कोव्हीडमुळे मेट्रोच्या कामामध्ये बराच काम अडथळा निर्माण झाला होता. मात्र त्यानंतर या कामाला काहीसा वेग आला आहे. नुकताच विद्यमान खासदार राजन विचारे यांनी मेट्रोच्या कामाचा आढावा घेतला असून आता हे काम २०२५ पर्यंत पूर्ण होणार असल्याचे जाहीर करण्यात आले आहे, यामुळे किमान दीड ते दोन वर्ष ठाणेकरांना या वाहतूक कोंडीचा सामना करावा लागणार आहे.
300x450
300x600