News
Stay updated with the latest stories, happenings, and developments from Thane.
महाराष्ट्र
यूपीतल्या ड्रग्ज फॅक्टरीचा ठाणे पोलिसांनी केला पर्दाफाश
यूपीतल्या ड्रग्ज फॅक्टरीचा ठाणे पोलिसांनी केला पर्दाफाश
फोटो: ठाणे वैभव
२७ कोटींचे ड्रग्ज बनवण्यासाठी लागणारे साहित्य जप्त
ठाणे : उत्तर प्रदेशातील एमडी ड्रग्ज फॅक्टरीचा ठाणे गुन्हे शाखेच्या पथकाने पर्दाफाश केला आहे. या प्रकरणी उत्तर प्रदेशमधील वाराणसी जिल्ह्यातून दोन आरोपींना ठाणे पोलिसांनी बेड्या ठोकल्या आहेत.
आरोपींच्या ताब्यातून तयार एमडी पावडर, ड्रग्ज बनवण्यासाठी लागणारे केमिकल आणि इतर साहित्य असे एकूण 27 कोटी 87 लाख रुपयांचा मुद्देमाल जप्त करण्यात आला आहे अशी माहिती गुन्हे शाखेचे पोलीस उपायुक्त शिवराज पाटील यांनी दिली.
ठाण्यातील कासारवडवली पोलीस ठाण्याच्या हद्दीत ठाणे गुन्हे शाखा युनिट एकच्या पथकाने 24 जानेवारी ते 13 फेब्रुवारी 2024 या कालावधीत आफताफ मलाडा (22, नालासोपारा, वसई, जिल्हा पालघर, जयनाथ यादव उर्फ कांचा (27, नालासोपारा), शेरबहाद्दूर राधेश्याम सिंग उर्फ अंकित (23, नालासोपारा) आणि हुसेन सैय्यद (48, नालासोपारा) या चौघांना अटक करून त्यांच्या ताब्यातून 14 लाख रुपये किमतीचे 481 ग्रॅम एमडी ड्रग्ज जप्त केले होते. दरम्यान, अटकेतील चौघा आरोपींनी हे ड्रग्ज कोठून आणले याचा तपास केला असता त्यांनी हे ड्रग्ज यूपीतून आणल्याचे समोर आले. त्यानंतर ठाणे गुन्हे शाखा युनिट एकचे एक पथक उत्तर प्रदेशात रवाना झाले होते.
पथकाने यूपीतल्या भगवतीपूर या छोट्याशा गावात तब्बल दीड महिना वेषांतर करून ड्रग्ज फॅक्टरीचा शोध घेतला. फॅक्टरीची माहिती हाती लागताच ठाणे गुन्हे शाखेच्या पथकाने 16 मार्च 2024 रोजी यूपी स्पेशल टास्क फोर्सच्या मदतीने सदर ड्रग्ज फॅक्टरीवर छापा टाकला. यावेळी अतुल सिंह (36, पूआरी खुर्द, जिल्हा वाराणसी, उत्तर प्रदेश) आणि संतोष गुप्ता (38, तिवारीपूर खुर्द, जिल्हा वाराणसी, उत्तर प्रदेश) या दोघांना एमडी ड्रग्ज बनवत असतांना पोलिसांनी रंगेहात पकडले. तर घरातच थाटलेल्या ड्रग्ज फॅक्टरीतून एमडी बनवण्यासाठी लागणारे केमिकल, इतर साहित्य, एक कार आणि दोन कोटी 64 लाखाचे तयार एमडी असे एकूण 27 कोटी 87 लाखाचा मुद्देमाल जप्त करण्यात ठाणे पोलिसांना यश आले.
ADVERTISEMENT 300x475
ADVERTISEMENT 300x475