महाराष्ट्र

महाराष्ट्राचं लाडकं नेतृत्व हरपलं बारामतीतील विमान अपघातात उपमुख्यमंत्री अजित पवारांचा मृत्यू

calendar_today 28 January 2026

schedule 5 मिनिटे वाचन

visibility 3 Views bookmark share

महाराष्ट्राचं लाडकं नेतृत्व हरपलं बारामतीतील विमान अपघातात उपमुख्यमंत्री अजित पवारांचा मृत्यू फोटो: ठाणे वैभव

बारामती: बारामती इथं झालेल्या विमान अपघातात राष्ट्रवादीचे अध्यक्ष आणि राज्याचे उपमुख्यमंत्री अजित पवार यांचे निधन झालं आहे. विमान लँड होत असताना झालेल्या या अपघातात उपमुख्यमंत्री अजित पवार यांच्यासह इतर तीन जणांचा मृत्यू झाल्याचे वृत्त आहे. याबाबत पीटीआय या वृत्तसंस्थेने माहिती दिली आहे. अजितदादांच्या अपघाती मृत्यूने महाराष्ट्र सुन्न झाला असून सर्वांनाच धक्का बसला आहे. अजित पवार हे आज सकाळी आपल्या काही सहकाऱ्यांसह मुंबईहून बारामतीकडे येत होते. जिल्हा परिषद निवडणुकांच्या पार्श्वभूमीवर अजितदादा हे सभेसाठी बारामतीला येण्यासाठी निघाले होते. मात्र बारामतीत पोहोचल्यानंतर विमान लँड होत असताना ते कोसळले. या अपघातात अजित पवारांसह इतर तीन जणांचा मृत्यू झाला. विमान अपघातात गंभीर जखमी झाल्यानंतर अजित पवार यांच्यासह इतर जखमींना बारामतीतील रुग्णालयातच उपचारासाठी दाखल करण्यात आलं होतं. परंतु तत्पूर्वीच त्यांच्या प्राणज्योत मालवली होती. अनेक वर्ष महाराष्ट्राचं उपमुख्यमंत्रिपद भूषवलेल्या अजितदादांसारख्या नेत्याच्या अकाली मृत्यूने राष्ट्रवादीच्या कार्यकर्त्यांसह महाराष्ट्रातील जनता शोकसागरात बुडाली आहे. भल्या पहाटे उठून जनसेवेत रुजू होणारे, नीटनेटकेपणा, स्वच्छता आणि राज्याच्या विकासासाठी झटत राहणारे नेते म्हणून अजित पवार हे राज्यभरात लोकप्रिय होते. अशा नेत्याच्या अकाली एक्झिटने सगळीकडे हळहळ व्यक्त केली जात आहे. बारामतीतून फुललेल्या अजितदादांच्या नेतृत्वाने पुढे राज्यभर आपलं गारूड तयार केलं. महाराष्ट्रासारख्या मोठ्या राज्याचे सर्वाधिक वेळा उपमुख्यमंत्रिपद भूषवण्याचा बहुमान त्यांना मिळाला. अजितदादांनी या पदाच्या माध्यमातून सतत कार्यरत राहत आपली छाप उमटवली. मात्र ज्या बारामतीतून हे नेतृत्व उभं राहिलं त्याच बारामतीत आज अजित पवार यांच्यावर काळाने घाला घातला असून त्यांच्या निधनाने शोककळा पसरली आहे.