ठाणे: शनिवारी सकाळी मुंब्रा भागात एक इमारतीचा स्लॅब कोसळून ७० वर्षांच्या ज्येष्ठ नागरिकाचा मृत्यू झाला. या घटनेमुळे पुन्हा एकदा मुंब्रा भागातील धोकादायक इमारतींचा प्रश्न ऎरणीवर आला आहे.
कौसा भागातील सिमला सोसायटी भागातील झुबेदा पार्क ही तळ अधिक चार मजल्यांची इमारत २२ वर्षांपूर्वी बांधण्यात आली होती. या इमारतीच्या दुसऱ्या मजल्यावरील नाजनीन शेख यांच्या घराचा स्लॅब शनिवारी सकाळी १० वाजता अचानक कोसळला. यात अब्दुल पटेल हे गंभीर जखमी झाले. त्यांना प्राईम रुग्णालयात उपचारासाठी दाखल केले असता डॉक्टरांनी त्यांना मृत घोषित केले. या इमारतीचे स्ट्रक्चरल ऑडिट करण्याचे आदेश महापालिकेने दिले आहेत.
पावसाळ्यात धोकादायक इमारतींचा प्रश्न ऎरणीवर येत असतो, परंतु पावसाळा सुरु होण्यापूर्वीच इमारत दुर्घटना घडली असून मुंब्रा-कौसा भागातील अनधिकृत धोकादायक इमारतींबाबत महापालिका प्रशासनाला काळजी घ्यावी लागणार आहे
