News
Stay updated with the latest stories, happenings, and developments from Thane.
महाराष्ट्र
महाराष्ट्रात महायुतीला २८ तर मविआला २० जागा?
महाराष्ट्रात महायुतीला २८ तर मविआला २० जागा?
फोटो: ठाणे वैभव
ओपिनियन पोलमध्ये पंतप्रधान म्हणून नरेंद्र मोदी यांनाच पसंती
मुंबई: एबीपी माझा आणि सी व्होटर यांनी केलेल्या ओपिनियन पोलनुसार राज्यात महायुतीला सर्वाधिक जागा मिळतील. या ओपिनियन पोलनुसार राज्यात भाजप, शिवसेना (शिंदे) आणि राष्ट्रवादी (अजित पवार) या पक्षांना मिळून २८ जागा तर महाविकास आघाडीला २० जागा मिळतील.
देशात एनडीएला ३६६ जागा मिळू शकतात तर इंडिया आघाडीला १५६ जागा मिळण्याचा अंदाज ओपिनियन पोलने वर्तवला आहे. दरम्यान पंतप्रधान म्हणून नरेंद्र मोदी यांनाच सर्वाधिक पसंती मिळाल्याचे पोलमधून स्पष्ट झाले आहे.
उद्या म्हणजे शनिवारी केंद्रीय निवडणूक आयोगाची पत्रकार परिषद होणार आहे. या पत्रकार परिषदेत लोकसभा निवडणूक २०२४ची घोषणा होईल आणि संपूर्ण देशात आचारसंहिता लागू होईल. निवडणुकांची घोषणा होण्याआधी करण्यात आलेल्या ओपिनियन पोलनुसार राज्यातील ४८ पैकी २८ जागा महायुतीला तर २० जागा महाविकास आघाडीला मिळण्याचा अंदाज आहे. या ओपिनियन पोलनुसार राज्यात भाजपला २२ जागा मिळतील. एकनाथ शिंदे अजित पवार यांना मिळून ६, काँग्रेसला ४ तर ठाकरे आणि शरद पवार यांना मिळून १६ जागा मिळतील असा अंदाज आहे.
२०१९च्या निवडणुकीत भाजपने २३ जागा जिंकल्या होत्या. सी व्होटरच्या पोलनुसार यावेळी त्यांची एक जागा कमी होताना दिसते. काँग्रेसला गेल्या निवडणुकीत १ जागा मिळाली होती यावेळी त्यात वाढ होत त्यांच्या खासदारांची संख्या ४ वर जाण्याची शक्यता आहे. शिवसेनेला १८ जागा मिळाल्या होत्या आणि राष्ट्रवादीला ४ जागा मिळाल्या होत्या. या दोन्ही पक्षाचे आता प्रत्येकी दोन गट झाले आहेत. शिंदे आणि अजित पवार यांना ६ तर ठाकरे आणि शरद पवार यांना १६ जागा मिळण्याचा अंदाज या ओपिनियन पोलमधून वर्तवला आहे.
राज्यात गेल्या वेळी एमआयएमला एक जागा मिळाली होती. यावेळी मात्र ही एकमेव जागा देखील त्यांना गमवावी लागू शकते.
मतांच्या टक्केवारीचा विचार केल्यास एनडीएला ५०.८८ टक्के मते २०१९ मध्ये मिळाली होती. २०२४ मध्ये त्यात घट होऊन ती ४२.७ इतकी होण्याची शक्यता आहे. युपीएला २०१९ मध्ये ३२.२४ टक्के मते मिळाली होती. यावेळी त्यात वाढ होऊन ती ४२.९ इतकी होण्याची शक्यता वर्तवण्यात आली आहे.
300x450
300x600