राष्ट्रवादी महिला काँग्रेस आक्रमक
ठाणे : राष्ट्रवादी काँग्रेसचे नेते डॉ. जितेंद्र आव्हाड यांची जीभ कापणार्‍यास 10 लाखांचे इनाम जाहीर करणारा भाजपचा जालना युवामोर्चा जिल्हाध्यक्ष कपिल देहेरकर याच्याविरुद्ध गुन्हा दाखल करावा, या मागणीसाठी ठाण्यात राष्ट्रवादीच्या महिला काँग्रेसने निदर्शने केली.
आगामी 24 तासात गुन्हा दाखल करून संबंधितास अटक केली नाही तर पोलीस ठाण्यासमोर ठिय्या आंदोलन करू, असा इशाराही शहर अध्यक्षा सुजाता घाग यांनी दिला.
राष्ट्रवादी काँग्रेसचे नेते डॉ. जितेंद्र आव्हाड यांच्या विधानाचा गैरअर्थ लावून त्यांच्या विरोधात कपिल देहेरकर याने चिथावणी देणारे विधान केले आहे. डॉ. आव्हाड यांच्यावर हल्ला करण्यासाठी जमावाला चिथावणी देण्याचे काम देहेरकर याने केले आहे. देहेरकर याने जालना येथे आंदोलन करुन डॉ. आव्हाड यांचे छायाचित्रही जाळले होते. त्याने केलेले कृत्य हे समाजविघातक असल्याचा आरोप करीत त्याच्यावर गुन्हा दाखल करावा, अशी तक्रार सुजाता घाग यांनी दिली होती.
या फिर्यादीच्या आधारे नौपाडा पोलीस ठाण्यात गुन्हा दाखल करावा, अशी लेखी तक्रार यावेळी दिली. मात्र, कर्तव्यावर असलेल्या पोलिसांनी चौकशी करून गुन्हा दाखल करण्यात येईल, असे आश्वासन दिले. या समाजकंटकावर आगामी 24 तासात गुन्हा दाखल करून अटक करावी; अन्यथा, आम्ही पोलीस ठाण्यासमोर ठिय्या आंदोलन करू, असा इशारा यावेळी सुजाता घाग यांनी दिला.
यावेळी सुजाता घाग यांच्या समवेत मेहरबानू पटेल, माधुरी सोनार, ज्योती निम्बर्गी, स्मिता पारकर, वंदना लांडगे आदी महिला कार्यकर्त्या उपस्थित होत्या.