अंबरनाथ: अंबरनाथच्या फॉरेस्ट नाका परिसरातील जुन्या डम्पिंग ग्राउंडला पुन्हा आग लागल्याचा प्रकार घडला आहे. दीड वर्षांपूर्वी डंपिंग ग्राउंड स्थलांतरित करण्यात आले आहे.
न्यायालयाच्या इमारतीसमोर असलेले डंपिंग ग्राउंड बंद होऊन दीड वर्षे उलटले तरी अद्याप या डम्पिंग ग्राउंडला आग लागण्याचा प्रकार घडत आहेत. अंबरनाथ फॉरेस्ट नाका परिसरात नगरपालिकेचे जुने डंपिंग ग्राउंड असून त्या ठिकाणी न्यायालयाची नवी इमारत उभारल्याने ते डंपिंग ग्राउंड नगरपालिकेला स्थलांतरित करावे लागले होते. डम्पिंग ग्राउंड स्थलांतरित करीत असताना पालिकेने असलेल्या कचऱ्यावर मातीचा भराव टाकून डंपिंग ग्राउंड बुजवला होता. डम्पिंग ग्राउंड बंद होऊन दीड वर्षे झाली असली तरी अद्याप त्या ठिकाणचा त्रास मात्र कमी झालेला नाही.
मागील आठवड्यात शनिवारी डंपिंग ग्राउंडला आग लागल्याने त्या ठिकाणचा कचरा जळू लागला होता. त्यासोबतच डम्पिंग ग्राउंडच्या परिसरात असलेले झाडे झुडपे देखील जळू लागल्याने त्याठिकाणी वणव्याचे स्वरूप आले होते. आगीमुळे परिसरात धुराचे साम्राज्य पसरले होते. हा डंपिंग ग्राउंड बंद झाला असला तरी रस्त्याच्या बाजूला उघड्यावर कचरा टाकल्याचे आढळून येते.
जुन्या डंपिंग ग्राउंडच्या ठिकाणी आग लागल्याचे समजताच पालिकेच्या अग्निशमन दलामार्फत आग विझवण्यात आल्याचे पालिका प्रशासनातर्फे सांगण्यात आले.