महाचित्रकला स्पर्धेत २१७८ विद्यार्थ्यांचा सहभाग
ठाणे : राष्ट्रवादी काँग्रेसचे नेते तथा माजी गृहनिर्माण व अल्पसंख्यांक मंत्री डाॅ.जितेंद्र आव्हाड यांच्या मार्गदर्शनाखाली मर्जिया पठाण यांच्या वतीने मुंब्रा येथे महाचित्रकला स्पर्धेचे आयोजन करण्यात आले होते. या स्पर्धेत २१७८ विद्यार्थ्यांनी सहभाग नोंदवला.
राष्ट्रवादी काँग्रेसच्या वतीने कौसा येथील डायमंड हाॅलमध्ये ही स्पर्धा आयोजित केली होती. चार गटांमध्ये ही स्पर्धा झाली. या स्पर्धेत सहभागी स्पर्धकांना वयोगटानुसार छत्रपती शिवाजीमहाराज, डाॅ. बाबासाहेब आंबेडकर, मौलाना अबूल कलाम आझाद, अश्फाक खान यांचे पोर्ट्रेट, निसर्गचित्र, माय मुंब्रा आदी विषय देण्यात आले होते. या स्पर्धेतील प्रत्येक गटाच्या विजेत्यास प्रथम क्रमांकास सायकल आणि ३०००/- द्वितीय क्रमांकास ३३००/- तृतीय क्रमांकास २१००/- आणि सन्मानचिन्ह देण्यात येणार आहे. या स्पर्धेतून ४० सुपर मुंब्रा निवडण्यात येऊन त्यांना ११००/- आणि सन्मानचिन्हाने गौरविण्यात येणार आहे. या स्पर्धेतील सर्व सहभागी स्पर्धकांना पदक आणि प्रमाणपत्र देण्यात येणार आहे.
मुंब्रा येथील विद्यार्थ्यांच्या कलागुणांना वाव देण्यासाठी या स्पर्धेचे आयोजन करण्यात आल्याचे मर्जिया पठाण यांनी सांगितले. या स्पर्धेला प्रचंड प्रतिसाद लाभला असून येत्या १३ सप्टेंबर रोजी सायंकाळी ७ वाजता माजी मंत्री आ. डाॅ.जितेंद्र आव्हाड, सय्यद अली अश्रफ, माजी विरोधी पक्षनेते शानू पठाण यांच्या उपस्थितीत डायमंड हाॅलमध्ये पारितोषिक वितरण करण्यात येणार आहे, असे सांगितले. ही स्पर्धा यशस्वी करण्यासाठी शानू पठाण, शाकीर शेख, साकिब दाते, मैसर शेख, नाजीम बुबेरे यांचे सहकार्य लाभले, असेही मर्जिया पठाण यांनी सांगितले.