एनडीआरएफने थांबवले त्या चिमूकलीचे शोधकार्य
कल्याण : बुधवारी दुपारी कल्याण स्थानकाच्या आधी रेल्वे रुळालगत आजोबांच्या हातातून सहा महिन्यांची चिमुकली पडून नाल्याच्या प्रवाहात वाहत गेल्याची घटना घडली होती. या घटनेमुळे सर्वत्र हळहळ व्यक्त होत होती. काल संध्याकाळपर्यंत अग्निशमन दल, रेल्वे पोलिस, स्थानिक पोलिसांनी या चिमूकलीचा शोध घेतला मात्र ती चिमुकली मिळून आली नाही.
आज सकाळपासून एनडीआरएफ, कल्याण डोंबिवली अग्निशमन विभाग, तहसील, पोलिसांच्या पथकाचे ठाकुर्ली खाडी परिसरात शोध मोहीम सुरू करण्यात आली. एनडीआरएफसह पोलीस, तहसील पथकाने तीन तास कल्याण ठाकुर्ली खाडीत सर्च ऑपरेशन केले. यानंतर एनडीआरएफने सर्च ऑपरेशन थांबवले. मात्र केडीएमसीच्या अग्निशमन विभागाचे सर्च ऑपरेशन सुरूच असून कल्याण ते मुंब्रा खाडीपर्यंत या चिमूकलीचा शोध घेतला जात आहे.
हैदराबादला राहणारी योगिता रुमाले ही भिवंडी परिसरात आपल्या माहेरी प्रसुतीसाठी आली होती. तिची लहानगी रिषिका हिच्यावर जन्मापासून मुंबईतील रुग्णालयात उपचार सुरु होते. त्यामुळे गेल्या काही महिन्यांपासून ती आपल्या आई-वडिलांकडेच वास्तव्याला होती. नेहमीप्रमाणे योगिता आपल्या वडिलांसह बुधवारी सकाळी मुलीला घेऊन तपासणीसाठी गेली होती. दुपारी काम आटोपून ती कल्याण-अंबरनाथ लोकलने निघाली. मात्र याचदरम्यान कल्याण पुढील रेल्वे मार्गावर पाणी साचल्याने लोकलचा खोळंबा झाला होता. जवळपास तासाभराहून अधिक वेळ लोकल उभी असल्याने अनेक प्रवाशांनी गाडीतून उतरून चालत जाण्याचा पर्याय निवडला.
योगिताही आपल्या वडिलांसोबत रुळांवरुन चालत होती. रिषिकाला आजोबांनी छातीशी कवटाळलं होतं. मात्र पुढे उभी असलेली लोकल नाल्याच्या अगदी जवळ असल्याने बाजूने अरुंद पाइपवरून वाट काढताना आजोबांचा पाय घसरला आणि त्यांच्या हातातील चिमुकली थेट नाल्यात पडली. नाल्याच्या पाण्याचा प्रवाह जास्त असल्याने ती वाहून गेली. घटनेची माहिती मिळताच कल्याण आणि डोंबिवली रेल्वे पोलिसानी घटनास्थळी धाव घेत माहिती घेतली. अग्निशमन दलाला पाचारण करण्यात आले. मात्र, चिमुकलीचा शोध लागत नव्हता.
दरम्यान, काल संध्याकाळी बाळ सापडल्याची बातमी पसरली आणि त्याबाबतचे दोन खोटे फोटोही व्हायरल झाले होते. त्यामुळे बाळ सापडल्याने सर्वत्र आनंद व्यक्त केला जात होता. परंतु हे फोटो ठाकुर्लीतील घटनेचे नसल्याचे उघड झाले असून अद्यापही बाळाचा शोध सुरू आहे.