मुंबई: शिवसेनेला लागलेली गळती अद्याप सुरू असल्याचे चित्र दिसत आहे. मुंबईतून शिवसेना नेते आणि खासदार गजानन किर्तीकर यांनी एकनाथ शिंदे यांच्या बाळासाहेबांची शिवसेना या पक्षात प्रवेश केला आहे.
गजानन किर्तीकर यांनी वर्षा बंगल्यावर जाऊन एकनाथ शिंदे यांची भेट घेतली होती. त्यानंतर रविंद्र नाट्य मंदिर येथील एका कार्यक्रमात गजानन किर्तीकर यांनी शिंदे गटामध्ये प्रवेश केला आहे. गजानन किर्तीकर यांचा शिंदे यांना पाठिंबा हा उद्धव ठाकरेंना मोठा धक्का मानला जात आहे. पुढील काही दिवसांमध्ये मुंबई महानगरपालिकेच्या निवडणुका होणार आहेत. त्यापूर्वी आणखी एका खासदाराने पक्ष सोडणे पक्षासाठी घातक ठरू शकते.
दक्षिण-मध्य मुंबईचे खासदार, लोकसभा गटनेते राहुल शेवाळे आणि माहीमचे आमदार सदा सरवणकर यांच्या पुढाकाराने, शिवसैनिक आणि मुंबईतील जनतेच्या वतीने, आज महाराष्ट्राचे मुख्यमंत्री एकनाथ शिंदे यांचा भव्य नागरी सत्कार झाला. या कार्यक्रमात गजानन किर्तीकर, रामदास कदम, राहुल शेवाळे उपस्थित होते. या कार्यक्रमापूर्वी खासदार गजानन किर्तीकर यांनी शिंदे गटात प्रवेश केला.